«Жигит султани»

Абдулла Розибақиев намидики 153-мәктәп-гимназиядә тәйярлиқ синиплири арисида «Жигит султани» көрүги болуп өтти. Ата-анилар вә оқуғучилар шу көрүкниң әзиз меһманлири болди. Мәзкүр көрүкниң асасий мәхсити әсирләр бойи келиватқан уйғур хәлқиниң миллий әнъәниси – «жигит султани»ниң жәмийәттики ролини, униң миллий қәдрийәтлиримизни сақлаштики вә келәчәк әвлатлиримизға мирас болуп қалдуруштики әһмийитини көрситиштин ибарәт болди. Бу чарә- тәдбирдә хәлқигә қалқан болған, өйниң егиси болуп һесапланған әзимәтләргә, йәни оғланларға һөрмәт билдүрүлди. Бүгүнки, XXI әсирдә, билим вә илимниң тәрәққий әткән дәвридә жигитләрниң һәртәрәплимә, һүнәр вә билимни бойиға сиңирип, өсүши муһим әһмийәткә егидур. Бүгүнки көрүктә жигитләр пәқәт өз һүнәрлирини көрситипла қоймай, бәлки билим вә маһаритиниму паш қилди.

Адил қазиларниң қарари бойичә «Сәнъәткар» нами бойичә Аюп Дәвләтов, «Ижаткар» нами бойичә Эмран Нәсирдинов, «Батур» нами бойичә Амир Аширов, «Мәргән» нами бойичә Йүсүп Маметраимовлар ғалип аталди.